გთხოვთ, მიუთითოთ შემდეგი ინფორმაცია:

ფასთა ინდექსაციის კალკულატორი შექმნილია „ინფრასტრუქტურული პროექტების განხორციელების ხელშეწყობის მიზნით ფასთა ინდექსაციის გამოყენების საფუძვლების, პრინციპებისა და წესის დამტკიცების თაობაზე“ საქართველოს მთავრობის №753 განკარგულების მიხედვით. კალკულატორის მიზანია, ფასთა ინდექსაციით მოსარგებლე სამშენებლო კომპანიებისთვის მარტივი პროცედურის შეთავაზება, რომელიც საშუალებას მისცემთ ფასთა ინდექსაციის შესახებ დასკვნა მიიღონ ონლაინ რეჟიმში. თანხის ინდექსაციის მიზნით კალკულატორი იყენებს ჯაჭვურად გადაბმული მშენებლობის ღირებულების ინდექსის (Construction Cost Index - CCI) მნიშვნელობებს. CCI შემუშავებულია საქსტატის მიერ საერთაშორისო მეთოდოლოგიისა და სტანდარტების მიხედვით.

1. აირჩიეთ საბაზო პერიოდი

№753 განკარგულების თანახმად, მიმდინარე ხელშეკრულების ფარგლებში 2022 წლის 1 აპრილიდან შესრულებული და შემდგომში ანაზღაურებული სამუშაოებისთვის საბაზო თვის სახით გამოიყენება 2022 წლის თებერვალი. პირველი პუნქტის არჩევისას მე-2 ეტაპის (ტენდერის გახსნის თარიღის) შევსება საჭირო აღარ არის. რაც შეეხება მიმდინარე და 2022 წლის 1 მაისამდე გამოცხადებული ტენდერების ფარგლებში შესრულებულ და შემდგომში ანაზღაურებულ სამუშაოებს, საბაზო თვის სახით გამოიყენება ტენდერის გახსნიდან 28 დღით ადრინდელი თარიღის შესაბამისი თვე (რაც არ შეიძლება, იყოს თებერვალზე ადრე). საბაზო თვის მიხედვით განისაზღვრება ინდექსის საბაზო პერიოდი და, შესაბამისად, აღნიშნულ პერიოდში არსებული საბაზისო ინდექსი არის 100 (შემდგომში – საბაზისო ინდექსი).

2. მიუთითეთ ტენდერის გახსნის თარიღი (ივსება მხოლოდ 1-ელ ეტაპზე მეორე პუნქტის არჩევის შემთხვევაში)

მიუთითეთ ტენდერის გახსნის თარიღი, რომელიც გამოყენებული იქნება საბაზო თვის განსაზღვრისთვის.

3. მიუთითეთ სამუშაოების შესრულების დონე

№753 განკარგულების თანახმად, თუ 2022 წლის 1 მარტის მდგომარეობით შესრულებულია სამუშაოების 10% ან/და ნაკლები, ხელშეკრულებაზე ვრცელდება ფასთა ინდექსაციით გამოწვეული დადებითი ან უარყოფითი ბალანი. წინააღმდეგ შემთხვევაში ხელშეკრულებაზე ვრცელდება ფასთა ინდექსაციით გამოწვეული მხოლოდ დადებითი ბალანსი.

4. ინფორმაცია შესრულებული სამუშაოს შესახებ

ცხრილში მიუთითეთ შემდეგი ინფორმაცია:

• • სამუშაოს შესრულების დასრულების პერიოდი (რიცხვი და თვე). აღნიშნული აუცილებელია ინდექსის საანგარიშო პერიოდის განსაზღვრისთვის. №753 განკარგულების თანახმად, საანგარიშო თვედ აიღება სამუშაოების პერიოდის ბოლო დღიდან 49 დღით ადრინდელი თარიღის შესაბამისი თვე (რაც არ შეიძლება იყოს თებერვალზე ადრე). საანგარიშო და საბაზო პერიოდებს შორის მშენებლობის ღირებულების ინდექსის ცვლილება არის საფუძველი შემდგომში თანხის ინდექსაციისთვის;

• შესრულებული სამუშაოს ღირებულება. წინა გრაფაში მითითებულ დროით პერიოდში შესრულებული სამუშაოს ღირებულების მითითებისას, მარჯვნივ არსებულ ველში (საინდექსაციო თანხა, ლარი) ავტომატურად გამოჩნდება საინდექსაციო თანხის ოდენობა, რომელიც შეადგენს შესრულებული და შემდგომში ანაზღაურებული სამუშაოების ღირებულების 70%-ს;

• ზემოთ მითითებული ინფორმაციის შევსების შემდეგ „გამოთვლის“ ღილაკზე დაკლიკების შედეგად მიიღება ფასთა ინდექსაციის საბოლოო შედეგი. №753 განკარგულების მე-3 მუხლის, მე-3 პუნქტის თანახმად, ასანაზღაურებელი თანხა არ უნდა აღემატებოდეს საინდექსაციო თანხის ოდენობის 10%-ს.

ერთსა და იმავე ხელშეკრულების ფარგლებში 1-ზე მეტი შესრულებული სამუშაოს შესახებ ინფორმაციის მითითებისას, შემდეგი სტრიქონის დამატება ხდება „+“ ღილაკზე დაკლიკებით. ცხრილის ბოლოს ავტომატურად მიეთითება ყველა შესრულებული სამუშაოს მიხედვით ასანაზღაურებელი თანხების ჯამი.

აღნიშნულის გარდა, კალკულატორი იძლევა საშუალებას ფასთა ინდექსაციით მიღებული შედეგი ცნობის სახით იქნეს დაგენერირებული, შემდგომი გამოყენებისთვის. ამისათვის, საჭიროა „დოკუმენტის გენერირების“ ღილაკზე დაკლიკება და შექმნილი დოკუმენტის შენახვა/ამობეჭდვა.